اتمكنى فى شغلك برعاية رئاسية.. وتجربتى كمصورة وزير ..الحكاية ومافيها -1

ازيكم  بعد 11 سنة ..من قلب مدونتى اللى عليها تراب.. احدثكم

..

 قبل أي كلام والدخول في موضوع النهاردة ..كان السبب في دخولى بعد الفترة دى كلها هنا أستاذتى عبير..فشكرا من قلبى ليكى ❤❤❤.. 

كان شغل المرأة زمان عيب وغريب  واللى تخرج تبئى مجنونة ومتمردة على التقاليد لكن مع ثورات التاريخ  خرجت المرأة للشارع وبدأت تشتغل واحدة واحدة بئت تنافس الراجل في مجالات كتير ..ظهر شوية تمييز في بعض الشغلانات ..وبئت في محدودية في المنافسة ..فجت مبادرات ووراها حكايات .. النهاردة هكلمكم عن موضوع مهم جدا ليا ولاى امرأة موجودة على أرض الدولة دى وهو عنوانه صعب شوية على كتير مننا يفهمه بنشوفه دايما في المؤتمرات الداخلية والعالمية والريس بيتكلم عنه وهو " تمكين المرأة في العمل والإستثمار "الموضوع الكبير بس هقولكم ايه الحكاية  واحكيلكم عن تجربتى كموظفة حكومية داخل كيان من كيانات الدولة دخلت مجال منفرد على مستوى الإناث وهو  تصوير الوزراء "

بداية حكاية " تمكين المرأة " لما أعلن الريس أن عام 2017 هو عيد للمرأة

وكمان أوصى الريس في منتدى شباب العالم في 2018 أن لابد من دعم المرأة واعتبارها كل شىء (ملف صوتى )

هنا العاصمة | السيسي يوجه بوضع تمويل تمكين المرأة " هي كل شيء بالنسبة لنا

   

وجت مناسبات كتير خارج البلاد اللى أكد فيها الريس دور المرأة  وحقها في التمكين زى قمة العشرين اللى كانت في يونيه 2019 فالريس حضر جلسة حول تمكين المرأة على هامش القمة

جلسة "تمكين المرأة" ضمن فعاليات قمة مجموعة العشرين بحضور الرئيس السيسي

بل كمان أوصى الحكومة  بضرورة  دراسة زيادة مساهمة المرأة في سوق العمل

السفيرة عزيزة - الرئيس السيسى : أوجه بدراسة زيادة مساهمة المرأة في سوق العمل

طب ايه حكاية " الاستراتيجية الوطنية للمرأة 2030 " هي استراتيجية حطها المجلس القومى للمرأة في 2017 

والريس قرر يدمجها مع استراتيجية مصر 2030 علشان الحكومة تشتغل عليها في السنوات الجاية ..والاستراتيجية دى متقسمة  لأربع حاجات التمكين السياسي والتمكين الاقتصادي والتمكين الاجتماعي والحماية من جميع أشكال العنف

وعلشان تعرفوا أكتر عنها زوروا مرصد المرأة المصرية

محاور استراتيجية المرأة 2030     

طب ازاى نعرف الحكومة نجحت فى تمكن المرأة في العمل ولا لا ..هنشوف الإحصائيات الاخيرة اللى قالتها الدكتورة هالة السعيد وزيرة التخطيط والإصلاح الإدارى اللى وضحت لينا وضع المرأة ايه في العمل خاصة في الكيانات الحكومية فى 2019

تفتكروا الدولة وقفت لغاية كده ولا عملت ايه للمراة تانى علشان تمكنها من العمل وميكنش في اى تمييز بينها وبين الرجل وايه هي تجربتى كمصورة وزير في كيان حكومي ..منتظرة تعليقاتكم وتفاعلكم ..وتابعونى علشان تعرفوا باقى الحكاية 

إمضاء 

مجنونة الدنيا  

كان في سنة اسمها 2008

نظرا للبيروقراطية والكلكعة الروتينية والشغل والشتا وما يترتب عليه من نوم تحت البطانية بعد يوم طويل متعب من العمل والتشعبط في المواصلات فطبيعي ملحقتش السنة الجديدة واكون لسه في القديمة فهخدها

فرصة قبل ما اركب ميكروباص 2009 واحكيلكم شوية عن 2008

من خلال عرض صور من البومها ونتامل شوية في الاحداث واشهدكم عليها

سقوط البورصة المصرية نتيجة الازمة المالية العالمية

الازمة المالية العالمية وتليها سقوط البورصة المصرية واعلان افلاسها اليوم 17/10/2008..

طبعا الخبر ده شفتوا تداعياته واللى حصل للناس اللى كانت حطه فلوسها كلها في البورصة اللى

اتجنن وقتل عيلته وولع في البيت واللى شنق نفسه واللى جاله انهيار عصبي وجلطة واللى

واللى واللى متعدوش واللى ميعرفش يبئى يشوف الفيديو ونصيحة منى للشعب الطيب ده بلاش

تحطوا فلوسكم في البورصة حطوها تحت البلاطة اضمن وحوشوا مع نفسكم اصل معدتش

حاجة مضمونة دلوقتى

خسارة الاهلي في اليابان

من اولها قبل ما اتنفس ولا انطق بحرف والله العظيم انا مش عميلة لاى نادي علي الكروة

الارضية انا بشجع المنتخب المصرى علي خفيف مليش في الكورة اصلا هههههههههه المهم

طبعا مصر اغلبها كانت مصدومة بالخبر ده اللى نزل زى البطيخة علي رؤس مشجعى الاهلي هههههههههه

وانا للاسف كنت من متابعين المباراة بالغصب لان زمايلى شغلوا الراديو علي الموبايل

اذاعة الشباب والرياضة في الشغل وكان يوم عسل معرفتش اشتغل الا لما المباراة

خلصت لانهم كانوا مصعوقين ونزل عليهم سهمالله وكان علي فكرة المعلق فظيع يحسسك

ان الكورة هتدخل في الجون وفي الاخر يقولك يا خسارة هههههههههههه كهرب زمايلى الله يجزيه

.شكله كان زملكاوي ههههههه ...المهم انتهت المباراة بالخسارة هدفين مقابل اربعة

وخرج الاهلي من البطولة والبقاء لله وتموت من الضحك لما تعرف ان الزمالكوية

شمتانين شماتة ما يعلم بيها ربنا مع انهم لسه خسارنين قدام فريق اسيوط ..والبعض

رجع هزيمة الاهلي انهم مكنوش مؤهلين للعب بالخارج في الوقت ده مطالبينهم بالرجوع

للعب مع الفرق المحلية ونخلي زيتنا في دقيقنا وبلاش نتفضح بره وناس رجعته لضعف

مستوي حارس المرمي والمطالبة بتبديله بالحضري وغيرها من الاسباب الكتير ...

اللى فيها ريحة الشماتة هههههههههه

ضرب الخنزير بوش بحذاء الصحفي العراقي البطل منتظر

اثناء المؤتمر الصحفي الذي جمع المالكي وبوش تفجا الصحفين بحذاء بيطير

في وش بوش لكن تلافاها بوش اما الفردةالتانية قدر المتمرس المالكي باخراجها

خارج الجون وملبستش في وش بوش للاسف جت اوووووووووت يا منتظر

كنت ظبطت ايديك شوية ياااه كنا غنينا لبوش اغنية عمرو مصطفي علامة في حياتك ههههههههه

المهم لما حصل الحدث ده الناس قامت مقعدتش والصحف ووكالات الانباء نشرت والمحللين

اتكلموا واصبح حديث العالم ان الرئيس الامريكى اضرب بالجزمةةةةةةة علي يد عربي

والعرب هيصوا وكانوا عايزين يعملوا يوم عربي للاحتفال بالحذاء لكن تناست الاغلبية الصحفي

اللى اول ما عمل كده انضرب وانسكرت ضلوعه من الحرس العراقي والامريكي ومازال في السجن

يعاني الامرين فربنا معاه يارب ويخرجه من الازمة دية لانه فعلا جدع وعمل اللى معملهوش

رئيس عربي يوحد ربنا والصراحة الواحد دماغه صرحت حولين الحذاء وفضلت افكر في

ايه اللى ممكن يحصل بعد الحدث ده يعنى ممكن الامريكان هيعملوا بعد كده المؤتمرات

بتاعتهم في المساجد علشان ميبقاش في جزم او يكتبوا علي باب بيت بوش سيب جزمتك

بره هههههههه او تغلي اسعار الجزم نظرا للاقبال الشديد اللي هيبئى عليها بما انها

اصبحت سلاح قوي في وجه اعدائنا فتحصل ازمة وتشح في السوق ويحصل احتكار

ومش نلاقي نشتري جزم هههههههههه ومش اى حد يبئى لابس جزمة

للشخصيات الهامة فقط هههههههههه وممكن تتحط في متحف زى الدنياصورات

مش نادرة بئى ههههههههه وتصبح تجارة الاحذية زى تجارة السلاح ههههههههههههه

بجد الاضواء الاعلامية كانت متسلطة علي الجزمة بشكل غبى خلتنا ننسى البطل

ونخلي الجزمة هى البطل يمكن لغرابة الحدث بس لولا منتظر مكنش الحدث اتشكل

فوز اوباما في الانتخابات الامريكية

فى الساعة السابعة صباحأ بتوقيت القاهرة، ظهرت نتيجة الانتخابات الامريكية

بعد حرب طويلة بين الرشح الديمقراطى باراك اوباما و المرشح الجمهرى جون مكين..

وكسب اوباما اللى من اب اسود من كينيا، و ام بيضاء من كنساس واختلفت ردود

الفعل حول الحدث ده ففي ناس كانت فرحانة بقدومه وبتتطلع لعهد جديد علي

اعتباره من اصل افريقي يعنى ممكن لو عنده دم الدم يحن هههههههه

وناس تانية كانت فاقدة الامل اللى جاي زى اللى راح وقالوا ده اسود من بره

لكن بيجرى في عروقه دماء بيضاء ..المهم السيد اوباما قال في نهاية خطابه

" دعونا نستدعى روح جديدة من الوطنية، من الخدمة و المسئولية

حيث بستقر كلآ منا و يعمل يجد اكثر" واختفي بعد كده وجارى البحث عنه

وعلي راي شعبولا أنا شايف الإبتسامة والفرحة ع الوشوش اياك بارك اوباما ما يكونش زي بوش وهيهيهيهيهيهيهيهيهيه
مين يعرف ولا يعلم في ايه جوه النفوس

بلاش من بدري نحلم لا يكون الحلم كابوس وهيهيهيهيهيهيهيهيهيه
خلينا زي ما احنا ما الهم خدنا عليه راح بوش وجه اوباما ايه يعني هيحصل ايه
وهيهيهيهيهيهيهيهيهيه لسه فلسطين محتله والحرب في العراق

والناس عايشه في مذله وعداء يجيب عداء وهيهيهيهيهيهيهيهيهيه

مهما هيعمل اوباما ويلف شمال ويمين لا يرجع الحريري ولا حتي الشيخ ياسين وهيهيهيهيهيهيهيهيهيه

عرفات مش جاى تانى اللى عاش ايام سواد ومات والكل عارف بحركات من الموساد وهيهيهيهيهيهيهيهيهيه

يا عربى الف سلامة يا عربى يا عينى عليك قاعد مستنى اوباما علشان ياخد بأيديك وهيهيهيهيهيهيهيهيهيه

ولا بوش ولا اوباما هيفكروا ابدا فيك يا عربى مفيش غير ايدك هى اللى راح تحميك وهيهيهيهيهيهيهيهيهيه

بوش يخرب بيت سنينة باعنا وضيعنا سنين وأوباما الناس فاكرينه هيكون صلاح الدين وهيهيهيهيهيهيهيهيهيه

ما هو بوش ابن المجنونة شعللها في كل مكان افغان وعراق وغزة واخرها سوريا كمان وهيهيهيهيهيهيهيهيهيه

هيعمل ايه اوباما في مصايب بوش وابوه ما سابوش مكان في العالم الا ما خربوه وهيهيهيهيهيهيهيهيهيه

مجاعات وأزمة ماليه وخرب ودمار وحروب اهو غار ابن المؤزية وسايبهالنا ع الطوب
وهييييييييييييييييييييييه

تميت سنة في شغلي

ياااااااااااه الايام بتعدي والشهور بتجري في ديلها مش مصدقة انى تميت سنة في شغلي

انا لسه حاسة انى بقالي فيه اسبوع بس انا مش فرحانة لانى مستفدتش من شغلي الا حاجات

بسيطة زى طريقة الشغل علي بعض البرامج وطريقة التعامل مع بعض النماذج البشرية

الموجودة في محيط الشغل واتعرفت علي ناس كويسة كونت منهم اصحاب المهم من ساعة

ما دخلت شغلي ده وانا مش مستوعبة اصلا حياتى معاه يعنى بشوف ناس عايشين

الدور بئى وشغل وكلام كبير لكن عمرى ما حسيت بكده عادي انا بتعامل بطبيعتى

الطفولية وحاسة انى لسه في الجامعة بس الضغط بئى كبيررررررررررررررر اوى

يمكن علشان شغلي طبيعته اصبح روتينى بعد ما انتهى مشروع التلفزيون

اللى كنت بشتغل فيه الاول من ساعة ما جيت الشركة يعنى بئى مملل شكلنا قرب

يبئى زى موظفات وموظفيين مجمع التحرير ههههههههههه ويمكن علشان كنت

واخدة علي الحركة في شغلي الصحفي ..حاسة انى مخي بئى

عامل زى الحديدة المصدية

لان مفيش فرصة زى زمان اتابع حتى الاخبار المصرية حتى اخبار بيتنا

بعرفها بالصدفة تخيلوا ههههههههه ومبقتش ارسم مبقتش اخرج كتير

اقول النوم احسن بروح واجي بحاول اكسر روتين شغلي بالخروج بعد الشغل والتمشية مع

زمايلى علي كوبرى قصر النيل ونشم هوا نقي حتى في عز الشتا وكمان ممكن

ناكل كشرى او حواوشى ونتفرج علي المحلات اومنركبش ونتمشى

لغاية المترو نتكلم المهم نخرج من جوه الروتيييييييييييين ده اللى بيموتنى

منكرش انه كانت فرصة شغلي في مكاني ده جت من عند ربنا وفرصة كويسة جدا

اى حد يتمناهاوبحمد ربنا عليها بس مش لاقية فيها نفسي مش عارفة اثبت فيه نفسي

ازاى مفيش مكان للابداع فيه ولا الفكر ادعوا ربنا يكرمنى بمكان شغل الاقي نفسي فيه

وابئى مبسوطة وانا بعمل شغلي واحس انى موجودة مش مليش وجود خالص .

غزة كلاكيت عشروميتتتتتلاتين مليون مرة تحت الحصار

مكنتش اعرف ان غزة اضربت عرفت وانا في الشغل انها اضربت ببشاعة ..

روحت البيت لقتهم قافلين التلفزيون حمدت ربنا لكن فتحوه فغيرت القنوات بسرعة

لفيلم او مسلسل هروبا من المشاهد الفظيعة اللى معروفة عن غزة واللى حفظناها

عن ظهر قلب من ساعة الانتفاضات الفلسطينية وفي اليوم السابع فتحت التلفزيون

وقررت اتابع قنوات الجزيرة والاقصي والساعة وراما وغيرها من القنوات ما انا مش

هفضل عايشة في الغيبوبة دي لقيت مشاهد متشابهة في كل مرة اقلب فيها القناة

صور مليان بالحزن والبشاعة متلطخة ببراثن العدوان الجبان ..ما بين اب

يبحث عن ابناءه وعائلته الراقدين تحت التراب ومكتوب عليه يفضل لوحده

في العالم ده ... ام لا تدري اين تخبىء اطفالها فالرصاص بكل مكان ...

ريحة الباردو والموت بتحوم حولين اى كائن حى موجود علي ارض غزة . الكل مستهدف المساجد ..المستشفيات .المساكن ..المدنين من اطفال لكبار.فريق الصليب الاحمر ..

افراد منظمة الاونرو..اجساد تسكو الشوارع ..عربات تحمل اشلاء ..

اطباء منهمكين في ترميم جراح المصابين ولف الشهداء ..مراسلين ومصورين ..

يحملوا مسئولية نقل الصورة الحقيقة التى سعت اسرائيل الي دفنها ...

.احتيجاجا ت في دول العالم تندد باعتداءات اسرائيل علي غزة واغتيالها لمفاهيم

الانسانية والطفولة البرئية ...مصر بتتشتم علشان معبر رفح ..المساعدات بتدخل

ولا مبتدخلش...الفريق الطبي المصري ..عالق مين السبب تضارب في الاقوال

حول ان مصر السبب اواسرائيل الله اعلم ..القناة الاولي بتقول المساعدات

بتدخل والجبلي وزير الصحة بينفي ان مصر منعت الاطباء من المرورلغزة

ورجع السبب لاسرائيل وعلي احد القنوات الفضائية يظهر مسؤول فلسطينى

في احد الجهات الاهلية يقول عكس ذلك .. .مبارك بيحاول يرضى الطرفين

ويجتمع مع ده وده ...القذافي بيقول نقفل الباب خالص ولا مفاوضات

ولا حرب نقاطع بس ...دول تانية سدت ودناها خالص ومكنش ليها

موقف علي الساحة ..اسرائيل مش راضية بكلام الاتحاد الاوروبي

ولا قرار الامم المتحدة بوقف اطلاق النار . واشنطن امتنعت عن التصويت

علي قرار الامم ....اولمرت رافض القرار وعايز يواصل العدوان علشان

يتخلص من حماس ..الضحايا بين صفوف حماس لا تتعدي العشرات

بالمقارنة بالجرحي المدنين الفين وشوية والشهداء 600 وشوية ..

هدنة اربع ساعات حياة ممنوحة للمدنيين ده ممكن نسميه بريك

علشان يستعدوا للموت وتدور من تاني طاحونة الحرب اللى مبترحمش ..

لغاية امتى يا عرب هتفضلوا ساكتين ..

وتنتهى سنة 2008 وتبدا سنة 2009 وتستمر الاحداث انا مضطرة اركب ميكروباص

السنة الجديدة لانى تعبت من السنة القديمة اوى ويارب الجاى يبئى احسن

بين الجدار شوفت ملاكي

بين الجدار ..شفت ملاكي

جريت عليه ..اشوف ملامحه.. قربت انادى

بعدت تاني .. خايفة اكسر الجدارواعدى

لاجرح فؤادي بيدي وابكى ملاكي

بس ..غصب عنى ..كسرته ..لميت ازازه ..ركنته

عورنى.. سال دمى ..بكا عيون ملاكي ..عليا

كلمنى ...وبحروف تايه منى ..سمعنى ..

قلبي .. ...هزني ..علشان اخرج من صمتى ..وزقنى ..

حاولت الملم حروف كلامى وامسح دموع الامى ..

شجعنى ملاكى ..قالي عايز اسمعك...ومن خوفك اطلعك ..

اتكلمت ..بدات ..بكلا م مربوط بخيوط من خوف ووجع وشرود

يعلن نهاية سكوتي اللى دام ليالي وبدل ايامي

اقف ..اسكت ..اكمل كلامى ...ارجع ابد من تانى

زى طفل صوغير تايه مش عارف منين طريقه بيحبى

مش عايزة اتكلم اقول مالى ...خايفة علي ملاكى من عتابي

خايفة كلمة اقولها تخرج منى غصبن عنى تتعبه ..تتعبنى

قررت اتوقف عن الكلام واتراجع عن اللى اتقال

سكتت

كلامه شق جدارصمتى ومن جوايا المنى

قالي حالك تعبنى ... انا السبب يا قلبي ..

كنت سبب فرحك

بقيت سبب جرحك

انا بموت من زعلى عليكى

مش بفوق من عذابي في لياليكى

مش مرتاح جنيت علي قلبك بايدي

سيبينى ابعد لبعيد

ده الحل الوحيد

غمضت عنيا

من شدة الم كلامه عليا

ملاكى في الدنيا دية

عايز يبعد طب مين يبئى ليا

ده هو كل ما ليا

اتمنيت اموت في اللحظة دية

ومشوفش حيرة قلبه وحالته دية

كنت فاكرة ان في الحزن ده لوحدى عايشة

اتارينا كنا عايشين فيه احنا الاتنين ولا حاسين

نطمن بعضينا بكدبة تحيينا لحد بكرة ونموت تاني من عذابنا اللى ملينا

لا يا ملاكي

استنى بلاش البعد القسية انا مش عايزة الخطوة دية

ويلا ندوس علي احاسيس مستحيلة ملهاش مكان في وسطينا

هتخلينا نموت في حياتنا كل ثانية ونكره حتى اسمينا

وننام كل ليلة بدموعنا ونداري نارنا ورا ضحكتنا

مش عايزة الدنيا ديه

عايزة ملاكي جنبى يبئى قصاد عنيا

ميغبش ويفضل حواليا

يهمسلي بقلبه احس بيه ويحس بيا

يجري ويشكيلى زى زمان ويحكيلى ويرخم عليا

ادويه من جرحه والمس فرحته بايديا

ولو بكيت يمسح دموع عنيا

لو حتى مستخبية

لو قلت اه يقولها قبليا

واكونله ضحكته وانسيه ازمته

وقسوة زمانه ودنيته

يلا معايا نرجع روحنا الحلوة وضحكتنا

بسمتنا هتبئى عنوانا

ولا حزن هيقرب منا ولا جرح هيضمنا

خفنا علي بعض يحمينا وصبرنا علي الايام يقوينا

انا بدعي في صلاتي ربنا ان يخلينا لبعضنا

ويمحى من عيونا دمعنا والفرح يلون قلبنا

من غير فرقة نكمل طريقنا من غيرحرقة تعكرصوفنا

قولوا امين

جدار ازاز

اتنين عوزاز اصبح ما بينهم جدار ازاز

جدار ازاز مابينهم ..نساهم حروف كلامهم

خلى السكات عنوانهم ..رغم ان الحقيقة قدامهم

يهربوا ..يبعدوا ..لبعيد .. يمكن في جديد

لكــن

يرجعوا ويلاقوا الحكاية هى هى و الجدار زاد شوية

مبقاش مابينهم كلام كله ...سكوت والام

خايفين ليتكلموا ومن الحقيقة يتالموا

الخوف ماليهم بيبعدهم عن بعضيهم

و المواجهة ..قدمت اعتذرها ..ليهم

من خوفها عليهم..لان النهاية .. اليمة ..

هتنهى حكاية جميله ..

كتبها ملاك لاتنين عوزاز

اصبح ما بينهم جدار ازاز

مش انااااا ..دي هي

مش انا دي هى... مش انا دي هى... مش انا دي هي ..

للاسف هي مش انا ..عادي هعمل ايه ..هى مش انا

.. معندتش فارقة ..كل حاجة بقت مش مهمة

افتكرت انه هو انا مش هى بس ..طلعت هى

عرفت ..ولما عرفت سكت ..بكيت ..سكت تاني..

صرخت من جوايا..كتمت الصرخة ..تعبت ..

من كتر البكي والسكوت

هقول ايه ما هو مش انا ..بس كانت صدمة ..

علشان افتكرت للحظة ان انا

عبيطة انا ..مخى بيروح لبعيد

بس جه ولما جه مكنتش انا ..طلعت هي

يا خسارة ..

مش كل اللى بنتمناه بيتحقق

يا خسارة..

مش كل اللى بنحسه بيطلع صح

يلا الحمد لله ...

وحشتينى يا ضحكتى

ضحكتى وحشتنى في قلب الليل سهتنى لمت هدومها وبعتنى لدمعتى

صحيت من النوم لقيت عنيا من الدموع مملية سالت علي ضحكتى كل اللى حواليا

قالولي دي صحيت الفجرية من كتر زهقاها من الدنيا دية طفشت يا عنيا

خرجت زى المجنونة دورت عليها وسط الطرق والشوارع ندهت عليها

باعلي صوت فيا انتى فين يا ضحكتى وحشتينى ردى عليا

ياللى كنتى منورة دنيتى وبتملي عليا وحدتى

ياللى كنتى بتسمعى لاخر الدنيا وبتلمى الناس عليا

بقيت دلوقتى من غيرك حزينة بضحك ضحكة غريبة

صدقينى مش من قلبي.. دي بتطلع مجروحة اليمة

وحشتينى يا ضحكتى

لسه فاكرة ايام زمان وانا بضحكك كنتى ضحكة جنان كانت بتسمع الجيران

وممكن يشتكو لحد الاذان علشان افصل الكوبس وانام

لفيت عليكى الميدان وسوقت عليكى المشايخ والمقام ..

.مش عارفة انام ما ترجعى بئى ..محيوسة ليه ما تتطلعي..

زهقت انا وشى كرمش من كتر حزنه هيطنش عن الفرح ويفنش ...

خليكى جدعة وارجعى ابوس اديكى اطلعي ..وحشتينى يا ضحكتى هههههههههههههه

هنفرمت القديم ونسطب الجديد

انا قررت وربنا يستر انى اقفل كل الدفاتر القديمة واكون انسانة جديدة من اول ينايرهعيش حياة سعيدة لانى تعبت اوى من القديم..المهم عايزة افتح صفحة جديدة بيضة مفهاش ولا نقطة حبر اسود او ملون كله ابيض في ابيض كانى لسه مولودة كانى لسه اول يوم في الشغل كانى لسه صاحية من النوم بعد نوم عميق امتد لـ23 سنة ...كانى معرفش حد وابدا اتعرف عليهم من جديد هيقولوا عليا مجنونة اه مش مشكلة المهم اعيش التجربة واحس انى انسانة جديدة واغير نمط حياتى نهائييييييييي ..احاول اقنع نفسي ان محصلش اى حاجة في السنين اللى فاتت وحشة ..واعمل فرمته لكل اللى فااااااات وافقد الذاكررررررة خاااااااالث مالث هههههههههههه غسيل مخ يعنى .. واعمل ريستارت وانزل ويندوز جديد فيستا مش اى اى ولا زى زى ...يلا نبدا ..هدوس ديليت علي كل الذكريات الاليمة والاحلام اللى متحققتش وندمت عليها وديليت علي كل الناااااااااس اللى معملتش ليا قيمة واستهترت بيا رغم اللى عملته ليها وداست علي قلبي بالشوووز ..يقطع شوزها يارب هههههههه ..وديليت علي كل المواقف البايخة اللى حصلت ليا..وبعد ديليت ندى امر

فرمته بئى لكل البرتيشينات اللى جوايا وبعدين ندخل السي دى الجديد في السى دى روم بتاعة قلبي وعقلي وتبدا تعمل

دونلود للمحتويات القديمة اللى كانت فيا وجه عليها الحزن والكابة وغطاها مع بعض المحتويات الجديدة يلا هضغط علي ريستارت طبعا العملية هتاخد مدة كبيرةةة علشان تفتح الجديد وهبئى عاملة خلال الفترة دية زى اللى لسه قايم من البنج بيخرف بئى ولسه بيظبط نفسه علي الجديد بس مش مشكلة المهم في الاخر هالاقي علي الديسك توب الجديد بتاعى اول ما افتح نفسي اللى كانت تايهة منى

يا ترى كام واحد في مصر هيفتكروا اليوم ده

النهاردة ..النهاردة ..النهاردة

يعنى يوم 16/12/1984 ..هو حصل فيه حاجة بسيطة وهى ان مصر قامت مقعدتش في اليوم ده مش علشان مفيش كراسي هههههههه لا لانه بس عيد ميلادي انا واختى التؤام اللى عاملة مدونة طرئعة دماغ..عملنا ازمة سكانية لاننا اتولدنا مع بعض مع فرق توقيت اكيد يعنى ثانية او دقيقة بس حاجة حلوة لما تلاقي انك اتولدت مع حد شبهك كانك بتبص في المرايا بس مع تصرفات ومشاعر مختلفة احيانا ..النهاردة مش فرحانة رغم انى داخلة علي سنة جديدة لانى خايفة من اللى جاي وببص للسنين اللى فاتت واللى حصل فيها وافتكر الاحداث اللي مريت بيها اللى منها الحلو واللى منها الوحش اللى بئى كتير اوى . لو قولت امنياتى للسنة الجديدة اغلبها صعب يتحقق منها انى بتمنى انى ارجع صغيرة من تاني والعب واطنطتت ومكنش شايلة في بالي اى حاجة غير انى هلعب ايه النهاردة وهشتري حلويات ايه وهيجيبوا كارتون ايه في التى في بس مهما اتمنيت خلاص الوقت جري والساعة دقت وكبرت خلاص وبقيت 24 سنة يااااااااه مش متخيلة ان كل الوقت ده عدي من عمرى ...كل مرة يعدي عيد ميلادي افرح واكون مبسوطة الا المرة دية معرفش ليه ..لدرجة ان امبارح الساعة كان فاضل عليها ديقيقتين وتدق12 ويبدا يوم جديدكان نفسي في لحظتها الوقت يقف والساعة تخرب علشان مسمعش دقاتهاومكبرش .. يلا نقول ايه قدرنا كده نكبر وحد يجى ورانا يرخم علينا ههههههه المهم نسيت اقول امنياتى للسنة الجديدة هى كتير طبعا بس بسيطة هحاول اكتب حبة منها ان ربنا يسعد الناس كلها ويكرمنى ويخلينى مبسوطة واخرج من حالة التدهور النفسي اللى بعيشه فيه ده واضحك عايزة اضحك من قلبي زى زمان وكمان عايزة انسي السنين اللى فاتت وابئى في مركز احسن من اللى انا فيه دلوقتى واشتهر كده واحقق امنية ماما وتشوفنى كده منورة في التى في ويارب كمان ماما تحج وتاخد بابا في ايديهاويديهم الصحة واختى تتوظف في احسن مكان فيكى يا مصر وتغير موبايلها وترمي القديم اللى بيبعت رسايل لوحده هههههههههههه ويوفق كل الناس اللى اعرفها واللى معرفهاش واصحابي في الشغل للاحسن ويسعد كل الناس , و في امنيات كده بينى وبين نفسي يارب تتحقق..متبصوليش كده مش هقوووولها ههههههههههه ..المهم سيبنا من الامنيات .. اول اول امبارح واول امبارح وامبارح والنهاردة في ناس افتكرت عيد ميلادي انا واختى وقالوا ليا ولاختى كل سنة وانتوا طيبين واللى بعت رسايل واللى اتصل فون او كلمنى علي الايميل او سابلى هدية في البروفيل بتاعي في الفيس بوك .. بس ياتري اصحابي بتوع الجامعة اللى بينا عشرة وملح وعيش وشطة هيفتكروا اليوم ده ولاالناس اللى كنت فاكراهم اقرب الناس ليا ودايما علي بالي في الحلوة والمرة هيفتكروا اليوم ده ...ياتري كام واحد في مصر هيفتكروا اليوم ده ...ياتري الريس هيفتكر ولا مشاغله كتير

جيالك يا شغلى صوتى يا مصر

بكرة الشغل ايوة ...مش مصدقين ليه ..هو صحيح العيد اعلنوا انه هيبئى 9 ايام بالوقفة والجمعات والسبتات اللى داخلة فيه بس انا هرجع بكرة شغلي وابدا من تاني الدوامة لان الاجازة بتاعتي كانت 3 ايام وبس طبعا الواقفة من الضمن وهطحن طاحنة محدش شافها في حياته من الساعة 8 الصبح لغاية 9 مساءا غرقانة في تقارير وعلي هذا المنوال برضوا يوم الخميس والبقاء لله بعد كده ههههههههههههههههههه يارب قوينا علي اليومين دول اخلص فيهم الشغل ده ومنزلش يوم الجمعة طبعا اكيد فيوزات مخي هتضرب في اليومين دول والمفروض اخرج يوم الجمعة ال يعنى ال هههههههههه ..ربنا يستر...جيالك يا شغلى صوتى يا مصرههههههه..انا بحلم من دلوقتى بيوم الخميس وانا خارجة من باب الشركة وطايرة علي بيتنا ونطه علي سريرى واغطس في المرتبة واروح في سابع نووومة وافضل اكل رز مع الملايكة لغاية ما يطلع عليا شمس يوم الجمعة ..امتى يجى اليوم ده ..

انسي يا قلبي

انسى يا قلبي ووفوق كلها في الاخر اوهام هتعمل ايه يا قلبي ولا حاجة غير انك تنسى اوام

حد عايز 200 جنيه سلف

انا كتبت البوست ده دعما للمنكوبين من موظفين وموظفات القطاع الخاص اللى من النوع اسبيشيل زى اللى بشتغل فيه حاليا ..كنا فيامانالله بنشتغل ودخل علينا زميلنا ويقولى معايا خبر بمليون جنيه كلنا بحلقنا وركزنا معاه فقال لينا ان الشركة اعلنت انها هتسلف كل الناس 200 جنيه ههههههههههههه من المرتب بتاعهم وبعدها ضرب راسه في الحيطة تمثيل يعنى من اثر الصدمة فضحكنا كلنا بشكل هاستيري من الصدمة هههههههه الصراحة الواحد كان فاكر ان دي اشاعة من الاشاعات النص كم لكن للاسف طلعت بحق وحقيقى وبدل ما الواحد يقبض مرتبه علشان يتشبرق به في العيد اخد 200 جنيه يشتري بيهم بمب ويفرقعه في نفسه ... انا اتصدمت طبعا لانى كنت حاطت خطط وحركات وحاجات كتيرهعملها بالمرتب بس كانت صدمتى اقلل مهما يكن بالمقارنة باللى فاتحين بيوت وعايزين يجيبوا لاولادهم لبس العيد للاسف العيد ده هيكتفوا ب 2 كيلو لحمة وبس ..اما انا هقضي العيد في البيت ومش هشتري لبس عيد هفضل اتفرج علي 200 جنيه يمكن يفقسوا 200 كمان ههههههههههههههههههه بهزر طبعا ودي تيجى انا روحت صرفت 55جنيه واديت ماما 100 يعنى في جيبى برضوا ههههههههههه هيرجعوا هيرجعوا هههههههههه والباقي 45 جنيه يا بلاش هههههههههههه عادي سيبكم المهم الفرحة اللى جوانا تبئى موجودة طز في الفلووووس لكن بتمنى بجد يبئى في مراعاة للمناسبات دية خاصة اللى شيلين مسؤولية بيت وزوجة واطفال الفرحة بجد بتقل مع نزول خبر زى ده صاروخ ارض جو علي مسامعهم ..اه بحق محدش عايز 200 جنيه سلف هههههههههههههه كل سنة وانتوا طيبين ويارب مش مفلسين ابدااا ابداا