بين الجدار شوفت ملاكي

بين الجدار ..شفت ملاكي

جريت عليه ..اشوف ملامحه.. قربت انادى

بعدت تاني .. خايفة اكسر الجدارواعدى

لاجرح فؤادي بيدي وابكى ملاكي

بس ..غصب عنى ..كسرته ..لميت ازازه ..ركنته

عورنى.. سال دمى ..بكا عيون ملاكي ..عليا

كلمنى ...وبحروف تايه منى ..سمعنى ..

قلبي .. ...هزني ..علشان اخرج من صمتى ..وزقنى ..

حاولت الملم حروف كلامى وامسح دموع الامى ..

شجعنى ملاكى ..قالي عايز اسمعك...ومن خوفك اطلعك ..

اتكلمت ..بدات ..بكلا م مربوط بخيوط من خوف ووجع وشرود

يعلن نهاية سكوتي اللى دام ليالي وبدل ايامي

اقف ..اسكت ..اكمل كلامى ...ارجع ابد من تانى

زى طفل صوغير تايه مش عارف منين طريقه بيحبى

مش عايزة اتكلم اقول مالى ...خايفة علي ملاكى من عتابي

خايفة كلمة اقولها تخرج منى غصبن عنى تتعبه ..تتعبنى

قررت اتوقف عن الكلام واتراجع عن اللى اتقال

سكتت

كلامه شق جدارصمتى ومن جوايا المنى

قالي حالك تعبنى ... انا السبب يا قلبي ..

كنت سبب فرحك

بقيت سبب جرحك

انا بموت من زعلى عليكى

مش بفوق من عذابي في لياليكى

مش مرتاح جنيت علي قلبك بايدي

سيبينى ابعد لبعيد

ده الحل الوحيد

غمضت عنيا

من شدة الم كلامه عليا

ملاكى في الدنيا دية

عايز يبعد طب مين يبئى ليا

ده هو كل ما ليا

اتمنيت اموت في اللحظة دية

ومشوفش حيرة قلبه وحالته دية

كنت فاكرة ان في الحزن ده لوحدى عايشة

اتارينا كنا عايشين فيه احنا الاتنين ولا حاسين

نطمن بعضينا بكدبة تحيينا لحد بكرة ونموت تاني من عذابنا اللى ملينا

لا يا ملاكي

استنى بلاش البعد القسية انا مش عايزة الخطوة دية

ويلا ندوس علي احاسيس مستحيلة ملهاش مكان في وسطينا

هتخلينا نموت في حياتنا كل ثانية ونكره حتى اسمينا

وننام كل ليلة بدموعنا ونداري نارنا ورا ضحكتنا

مش عايزة الدنيا ديه

عايزة ملاكي جنبى يبئى قصاد عنيا

ميغبش ويفضل حواليا

يهمسلي بقلبه احس بيه ويحس بيا

يجري ويشكيلى زى زمان ويحكيلى ويرخم عليا

ادويه من جرحه والمس فرحته بايديا

ولو بكيت يمسح دموع عنيا

لو حتى مستخبية

لو قلت اه يقولها قبليا

واكونله ضحكته وانسيه ازمته

وقسوة زمانه ودنيته

يلا معايا نرجع روحنا الحلوة وضحكتنا

بسمتنا هتبئى عنوانا

ولا حزن هيقرب منا ولا جرح هيضمنا

خفنا علي بعض يحمينا وصبرنا علي الايام يقوينا

انا بدعي في صلاتي ربنا ان يخلينا لبعضنا

ويمحى من عيونا دمعنا والفرح يلون قلبنا

من غير فرقة نكمل طريقنا من غيرحرقة تعكرصوفنا

قولوا امين

جدار ازاز

اتنين عوزاز اصبح ما بينهم جدار ازاز

جدار ازاز مابينهم ..نساهم حروف كلامهم

خلى السكات عنوانهم ..رغم ان الحقيقة قدامهم

يهربوا ..يبعدوا ..لبعيد .. يمكن في جديد

لكــن

يرجعوا ويلاقوا الحكاية هى هى و الجدار زاد شوية

مبقاش مابينهم كلام كله ...سكوت والام

خايفين ليتكلموا ومن الحقيقة يتالموا

الخوف ماليهم بيبعدهم عن بعضيهم

و المواجهة ..قدمت اعتذرها ..ليهم

من خوفها عليهم..لان النهاية .. اليمة ..

هتنهى حكاية جميله ..

كتبها ملاك لاتنين عوزاز

اصبح ما بينهم جدار ازاز

مش انااااا ..دي هي

مش انا دي هى... مش انا دي هى... مش انا دي هي ..

للاسف هي مش انا ..عادي هعمل ايه ..هى مش انا

.. معندتش فارقة ..كل حاجة بقت مش مهمة

افتكرت انه هو انا مش هى بس ..طلعت هى

عرفت ..ولما عرفت سكت ..بكيت ..سكت تاني..

صرخت من جوايا..كتمت الصرخة ..تعبت ..

من كتر البكي والسكوت

هقول ايه ما هو مش انا ..بس كانت صدمة ..

علشان افتكرت للحظة ان انا

عبيطة انا ..مخى بيروح لبعيد

بس جه ولما جه مكنتش انا ..طلعت هي

يا خسارة ..

مش كل اللى بنتمناه بيتحقق

يا خسارة..

مش كل اللى بنحسه بيطلع صح

يلا الحمد لله ...

وحشتينى يا ضحكتى

ضحكتى وحشتنى في قلب الليل سهتنى لمت هدومها وبعتنى لدمعتى

صحيت من النوم لقيت عنيا من الدموع مملية سالت علي ضحكتى كل اللى حواليا

قالولي دي صحيت الفجرية من كتر زهقاها من الدنيا دية طفشت يا عنيا

خرجت زى المجنونة دورت عليها وسط الطرق والشوارع ندهت عليها

باعلي صوت فيا انتى فين يا ضحكتى وحشتينى ردى عليا

ياللى كنتى منورة دنيتى وبتملي عليا وحدتى

ياللى كنتى بتسمعى لاخر الدنيا وبتلمى الناس عليا

بقيت دلوقتى من غيرك حزينة بضحك ضحكة غريبة

صدقينى مش من قلبي.. دي بتطلع مجروحة اليمة

وحشتينى يا ضحكتى

لسه فاكرة ايام زمان وانا بضحكك كنتى ضحكة جنان كانت بتسمع الجيران

وممكن يشتكو لحد الاذان علشان افصل الكوبس وانام

لفيت عليكى الميدان وسوقت عليكى المشايخ والمقام ..

.مش عارفة انام ما ترجعى بئى ..محيوسة ليه ما تتطلعي..

زهقت انا وشى كرمش من كتر حزنه هيطنش عن الفرح ويفنش ...

خليكى جدعة وارجعى ابوس اديكى اطلعي ..وحشتينى يا ضحكتى هههههههههههههه

هنفرمت القديم ونسطب الجديد

انا قررت وربنا يستر انى اقفل كل الدفاتر القديمة واكون انسانة جديدة من اول ينايرهعيش حياة سعيدة لانى تعبت اوى من القديم..المهم عايزة افتح صفحة جديدة بيضة مفهاش ولا نقطة حبر اسود او ملون كله ابيض في ابيض كانى لسه مولودة كانى لسه اول يوم في الشغل كانى لسه صاحية من النوم بعد نوم عميق امتد لـ23 سنة ...كانى معرفش حد وابدا اتعرف عليهم من جديد هيقولوا عليا مجنونة اه مش مشكلة المهم اعيش التجربة واحس انى انسانة جديدة واغير نمط حياتى نهائييييييييي ..احاول اقنع نفسي ان محصلش اى حاجة في السنين اللى فاتت وحشة ..واعمل فرمته لكل اللى فااااااات وافقد الذاكررررررة خاااااااالث مالث هههههههههههه غسيل مخ يعنى .. واعمل ريستارت وانزل ويندوز جديد فيستا مش اى اى ولا زى زى ...يلا نبدا ..هدوس ديليت علي كل الذكريات الاليمة والاحلام اللى متحققتش وندمت عليها وديليت علي كل الناااااااااس اللى معملتش ليا قيمة واستهترت بيا رغم اللى عملته ليها وداست علي قلبي بالشوووز ..يقطع شوزها يارب هههههههه ..وديليت علي كل المواقف البايخة اللى حصلت ليا..وبعد ديليت ندى امر

فرمته بئى لكل البرتيشينات اللى جوايا وبعدين ندخل السي دى الجديد في السى دى روم بتاعة قلبي وعقلي وتبدا تعمل

دونلود للمحتويات القديمة اللى كانت فيا وجه عليها الحزن والكابة وغطاها مع بعض المحتويات الجديدة يلا هضغط علي ريستارت طبعا العملية هتاخد مدة كبيرةةة علشان تفتح الجديد وهبئى عاملة خلال الفترة دية زى اللى لسه قايم من البنج بيخرف بئى ولسه بيظبط نفسه علي الجديد بس مش مشكلة المهم في الاخر هالاقي علي الديسك توب الجديد بتاعى اول ما افتح نفسي اللى كانت تايهة منى

يا ترى كام واحد في مصر هيفتكروا اليوم ده

النهاردة ..النهاردة ..النهاردة

يعنى يوم 16/12/1984 ..هو حصل فيه حاجة بسيطة وهى ان مصر قامت مقعدتش في اليوم ده مش علشان مفيش كراسي هههههههه لا لانه بس عيد ميلادي انا واختى التؤام اللى عاملة مدونة طرئعة دماغ..عملنا ازمة سكانية لاننا اتولدنا مع بعض مع فرق توقيت اكيد يعنى ثانية او دقيقة بس حاجة حلوة لما تلاقي انك اتولدت مع حد شبهك كانك بتبص في المرايا بس مع تصرفات ومشاعر مختلفة احيانا ..النهاردة مش فرحانة رغم انى داخلة علي سنة جديدة لانى خايفة من اللى جاي وببص للسنين اللى فاتت واللى حصل فيها وافتكر الاحداث اللي مريت بيها اللى منها الحلو واللى منها الوحش اللى بئى كتير اوى . لو قولت امنياتى للسنة الجديدة اغلبها صعب يتحقق منها انى بتمنى انى ارجع صغيرة من تاني والعب واطنطتت ومكنش شايلة في بالي اى حاجة غير انى هلعب ايه النهاردة وهشتري حلويات ايه وهيجيبوا كارتون ايه في التى في بس مهما اتمنيت خلاص الوقت جري والساعة دقت وكبرت خلاص وبقيت 24 سنة يااااااااه مش متخيلة ان كل الوقت ده عدي من عمرى ...كل مرة يعدي عيد ميلادي افرح واكون مبسوطة الا المرة دية معرفش ليه ..لدرجة ان امبارح الساعة كان فاضل عليها ديقيقتين وتدق12 ويبدا يوم جديدكان نفسي في لحظتها الوقت يقف والساعة تخرب علشان مسمعش دقاتهاومكبرش .. يلا نقول ايه قدرنا كده نكبر وحد يجى ورانا يرخم علينا ههههههه المهم نسيت اقول امنياتى للسنة الجديدة هى كتير طبعا بس بسيطة هحاول اكتب حبة منها ان ربنا يسعد الناس كلها ويكرمنى ويخلينى مبسوطة واخرج من حالة التدهور النفسي اللى بعيشه فيه ده واضحك عايزة اضحك من قلبي زى زمان وكمان عايزة انسي السنين اللى فاتت وابئى في مركز احسن من اللى انا فيه دلوقتى واشتهر كده واحقق امنية ماما وتشوفنى كده منورة في التى في ويارب كمان ماما تحج وتاخد بابا في ايديهاويديهم الصحة واختى تتوظف في احسن مكان فيكى يا مصر وتغير موبايلها وترمي القديم اللى بيبعت رسايل لوحده هههههههههههه ويوفق كل الناس اللى اعرفها واللى معرفهاش واصحابي في الشغل للاحسن ويسعد كل الناس , و في امنيات كده بينى وبين نفسي يارب تتحقق..متبصوليش كده مش هقوووولها ههههههههههه ..المهم سيبنا من الامنيات .. اول اول امبارح واول امبارح وامبارح والنهاردة في ناس افتكرت عيد ميلادي انا واختى وقالوا ليا ولاختى كل سنة وانتوا طيبين واللى بعت رسايل واللى اتصل فون او كلمنى علي الايميل او سابلى هدية في البروفيل بتاعي في الفيس بوك .. بس ياتري اصحابي بتوع الجامعة اللى بينا عشرة وملح وعيش وشطة هيفتكروا اليوم ده ولاالناس اللى كنت فاكراهم اقرب الناس ليا ودايما علي بالي في الحلوة والمرة هيفتكروا اليوم ده ...ياتري كام واحد في مصر هيفتكروا اليوم ده ...ياتري الريس هيفتكر ولا مشاغله كتير

جيالك يا شغلى صوتى يا مصر

بكرة الشغل ايوة ...مش مصدقين ليه ..هو صحيح العيد اعلنوا انه هيبئى 9 ايام بالوقفة والجمعات والسبتات اللى داخلة فيه بس انا هرجع بكرة شغلي وابدا من تاني الدوامة لان الاجازة بتاعتي كانت 3 ايام وبس طبعا الواقفة من الضمن وهطحن طاحنة محدش شافها في حياته من الساعة 8 الصبح لغاية 9 مساءا غرقانة في تقارير وعلي هذا المنوال برضوا يوم الخميس والبقاء لله بعد كده ههههههههههههههههههه يارب قوينا علي اليومين دول اخلص فيهم الشغل ده ومنزلش يوم الجمعة طبعا اكيد فيوزات مخي هتضرب في اليومين دول والمفروض اخرج يوم الجمعة ال يعنى ال هههههههههه ..ربنا يستر...جيالك يا شغلى صوتى يا مصرههههههه..انا بحلم من دلوقتى بيوم الخميس وانا خارجة من باب الشركة وطايرة علي بيتنا ونطه علي سريرى واغطس في المرتبة واروح في سابع نووومة وافضل اكل رز مع الملايكة لغاية ما يطلع عليا شمس يوم الجمعة ..امتى يجى اليوم ده ..

انسي يا قلبي

انسى يا قلبي ووفوق كلها في الاخر اوهام هتعمل ايه يا قلبي ولا حاجة غير انك تنسى اوام

حد عايز 200 جنيه سلف

انا كتبت البوست ده دعما للمنكوبين من موظفين وموظفات القطاع الخاص اللى من النوع اسبيشيل زى اللى بشتغل فيه حاليا ..كنا فيامانالله بنشتغل ودخل علينا زميلنا ويقولى معايا خبر بمليون جنيه كلنا بحلقنا وركزنا معاه فقال لينا ان الشركة اعلنت انها هتسلف كل الناس 200 جنيه ههههههههههههه من المرتب بتاعهم وبعدها ضرب راسه في الحيطة تمثيل يعنى من اثر الصدمة فضحكنا كلنا بشكل هاستيري من الصدمة هههههههه الصراحة الواحد كان فاكر ان دي اشاعة من الاشاعات النص كم لكن للاسف طلعت بحق وحقيقى وبدل ما الواحد يقبض مرتبه علشان يتشبرق به في العيد اخد 200 جنيه يشتري بيهم بمب ويفرقعه في نفسه ... انا اتصدمت طبعا لانى كنت حاطت خطط وحركات وحاجات كتيرهعملها بالمرتب بس كانت صدمتى اقلل مهما يكن بالمقارنة باللى فاتحين بيوت وعايزين يجيبوا لاولادهم لبس العيد للاسف العيد ده هيكتفوا ب 2 كيلو لحمة وبس ..اما انا هقضي العيد في البيت ومش هشتري لبس عيد هفضل اتفرج علي 200 جنيه يمكن يفقسوا 200 كمان ههههههههههههههههههه بهزر طبعا ودي تيجى انا روحت صرفت 55جنيه واديت ماما 100 يعنى في جيبى برضوا ههههههههههه هيرجعوا هيرجعوا هههههههههه والباقي 45 جنيه يا بلاش هههههههههههه عادي سيبكم المهم الفرحة اللى جوانا تبئى موجودة طز في الفلووووس لكن بتمنى بجد يبئى في مراعاة للمناسبات دية خاصة اللى شيلين مسؤولية بيت وزوجة واطفال الفرحة بجد بتقل مع نزول خبر زى ده صاروخ ارض جو علي مسامعهم ..اه بحق محدش عايز 200 جنيه سلف هههههههههههههه كل سنة وانتوا طيبين ويارب مش مفلسين ابدااا ابداا

مذكرات خريجة مفروسة (1)

اعرفكم بنفسى انا اللى حاولت الايام تهد منى لكن قولتها لا.. حسبى ...انتى كسرتينى ... كتير.. كفايه عليك تكسير
... فقررت اكتب واكتب واكتب .....مذاكراتى من اول ما دخلت الجامعة لغاية ما مبقيت صحفية وبعدين باحثة اعلامية ..........خليكوا معايا ................................

الحلقة الاولى

خلصت مرحلة الثانويةاللى بيقولوا عليهاعنق الزجاجة او عفريت العلبة وخرجت منها باقل الخسائر بس حصلى حاجة بسيطة اوى تخلف عقلى وزهايمر وتدمير نفسى وعصبى لكن متخفوش عليا انا استرجعت قواى العقلية والنفسية فى الفترة اللى بيقولوا عليها اجازة المهم جينا لمرحلة التنسيق والمجموع دى حاجة طبعا عارفين اثارها الجانبية ومش هكرر مأساة التنسيق عليكم الله لا يرجعها هدخلكوا على البهجة عدل وهو دخولى اداب قسم اعلام تخصص صحافة طبعا ( هتقولوا ماشاء الله عايزة ايه اكتر من كده ).... انا هعذركم لانكم لسه مش عارفين حاجة عن حكايتى مع القسم ده اكيد مش هنكر اني كنت فرحانه زي زيكم لانى بحب الصحافة وبحب اكتب وكان نفسى ابقى صحفية لها شنه ورنه وغيرها من الاحلام العبيطة اللى كنت بحلم بيها زمان...لكن على رأى اهلينا الطيبيين جت الحزينة تفرح ما لئتش ليها مترح المهم بدات الدراسة عادى اكيد لازم تبدا وكان اول يوم ليا ما اولو كمش عليه المنظر العام فى حرم الجامعة كان عامل زى فيلم عربى .. على شوية هندى وبهرات افرنجى اللى جى وشايف نفسه اوى ولابس اللى على الحبل كله واللى تايه مش عارف يروح فين واللى داخل فى الدور اوى مخلاص كبر بقى واللى شايل فى دماغه مشاهد من فيلم يا تحب يا تقب او كلم ماما وفاكر ان ديه صورة الجامعة واللى واللى متعدوش اما انا فرحت اشوف الجدول وعرفت مكان المحاضرة الاولى والتانية والرابعة .........الخ دخلت فى دور الطالبة الملتزمة من اولها وكونت اصدقاء ياسلام ونعم الاصدقاء كانوا اول بختى فى الجامعة شعارهم مصلحتك قبل صحبك ... اكيد انتوا عارفين النهاية ..سبتهم طبعا بعد ما الكيل طفح وبعدين صحبت ناس تانيه وتالته متعدوش وكل مرة اقول يمكن العيب منى لكن فى النهاية لقيت ان الصداقة مجرد قناع للمصلحة وفى نهايه المطاف لقيت مجموعة من الاصدقاء افتكرت ان هيتحقق فيهم معنى الصداقة الحقيقى وبدانا مشوارنا مع بعض فى الدراسة ...بس ما تفتكروش ان المصلحة هى الشايعة فى الجامعة ده كمان الوسطة وفين !! تخيلوا فى الجريدة اللى بينشرها قسم اعلام فتلاقى صفحات باكملها مخصصة لزميل اوزميلة لانه ابن ابصر ايه فى الدنيا اللى بره واللى جوه وانا وغيرى لما نيجى نعمل موضوع ونعرضه على المشرفيين علينا نسمع منهم كلام معسول ويقولوا ده هيتنشر فى الصفحة الاولى وتجى تبص على الجورنال تلاقى المنشور ده موضوعك بس مش تحت اسمك ده اسم بن فلان او موضوع تانى خايب او اضعف الايمان يتم نشره بس من غير اسمك يا حلو ومحذوف منه تلات تربعه وتيجى تتكلم وتعبر عن رفضك متلقيش حد يسمعك ما هى كوسة... بقى ده كلام يا اخوانا بيربوا الاجيال على الوسطة والمحسوبية بدل ما يعلموهم ان من جد وجد ومن زرع حصد طيب سبنا من ده كله بدانا مواال المحاضرات والدراسة وكان منهجنا قريب من الثانوية العامة نظام كتاتيب ماركة العلم فى الكراس مش فى الراس فقلت فى بالى يعنى هى هتيجى على ديه ما العالم كله ماشى بالمقلوب فوتوا ديه المهم فى اللى جى ورا ...............

اشوفكم فى الحلقة الجايه

مااااء ماااااء هههههههههه

العيد جه تخيلوا ..هههههههههه..كل سنة وانتوا طيبين ومن ربنا قريبين ومن اللحمة واكلين ..

وده اول عيد يعديى علي مدونتى فبجد بتمنى يكون فتحت خير عليها

وتكبر كده وتبئى اشهر مدونة فيكى يامصر ..ووصيت خروفى ليكم ما يلي خد بالك انت وهى وهو ههههههههه

عايزة اكتب

طبعا هتستغربوا انى لسه فاكرة اكتب بين جدران مدونتى اللى ملاها التراب وقربت تتضلم بعد ما قصيت الشريط وكتبت موضوعين وسكت علي كده بس مش بايدى لانى انا من البداية لما عملت المدونة دية كان عندي امل انى ارجع اكتب زى زمان لكن برضوا الشعور المتلخبط اللى كان بيخلينى مبقدرش اكتب لسه مستمر لما اجي اكتب عن اللى جوايا او عن اى حاجة معرفش ليه او يمكن ده كسل يمكن مش عارفة اهو حاجة بتوقفنى عن الكتابة مع ان بيكون في كلام كتير اووووى محتاج يطلع علي الورق..بس رغم ده معرفش ايه خلاني اقرب جنب الكيبورد واكتبلكم النهاردة يمكن لانى زهقت من ضغط الكلام اللى جوه دماغي وجوه قلبي وعايز يطلع وانا رافضة ده ..عايزة اكتب فعلا محتاجة اكتب كل حاجة فيارب ارجع اكتب زى زمان ولغاية ما اعدي المرحلة دية خطوة خطوة هنزل ليكم حاجات قصيرة كده من تاليفي منها الجديد والقديم

يا افراحك يا مصــر

بما انى اتعزمت الفترة اللى فاتت علي اكثر من فرح ده غير الافراح اللى قبل كده فاقدر اقولكم ان افراحنا المصرية بجد بتخلي دماغ الواحد تقلب علامة استفهام كبيرةةةةة ويبئى مسبهل كده يعنى فاتح بؤه زى نفق شبرا هههههههههه لانه بجد افراحنا غريبة ركز انت كده في الدي جي اللى شغال في الافراح هتلاقي ثلاث تربعه نكد وااهات ودموع واحزان ههههههههه ناسين ان ده فرح مش ميتم واللى يخليك تتجنن الناس تبئى هايصة علي الاخر ومتمزجه علي الاغاني الحزينة دية صحيح شعب يموت في النكد ههههههههه فتلاقي اغنية انا مش انا والشيطان قال للعبد اشرب يا منيل وجوجوجو وبرافوا عليك واعتبره كلب وراح ههههههههههههههه واغنية المحكمة يالهوى هههههه اموت انا.. وهلمجرا من الاغاني اللى تسد النفس المفتوحه بس سيبك انت شعبنا بيدوس في النكد وبيرقص عليه هههههههه فين اغاني الافراح التراثية والجديدة اللى بتدل علي اننا في فرح ما الدنيا واسعة وفي الف اغنية بتحسسنا اننا في فرح .. عالم عجيبة !! ده انا لو الدي جي شغل الحاجات دي في فرحى يدينى ويديكم طولت العمر يعنى هههههههه هبلغ عنه منظمات حقوق الانسان والامم المتحدة ههههه بجد الظاهرة ديةة انا بلاحظها في معظم الافراح بتاعتنا فبندهش من المزيج اللى بيحصل بين الفرح والحزن في ان واحد وسط ضجيج ولغة غير مفهومة في بعض الاوقات ..بحس ان شعبنا بيبئى شارب من كيعانه مش فارقة بئى بيرقص علي ايه مش مهم فرح حزن المهم يلحق اللحظة ويرقص ويتبسط حتى لو علي اوجاعه وجروحه يمكن الاغلب يشوف ان الموضوع اللى بثيره تافه لكن بجد لو اتعمقنا فيه واتاملناه ممكن نقف عنده ونطلق عنان دماغنا بس حاسب لتخبط في سقف اللامنطقية في دنيا مجنونة عباسية نلتقي بعد الفاصل

قــلــقــانة

اوقات بخاف فيها وانا لوحدى وحاجات تجيب فى خيالى وتودى وده لما ببقى لوحدى مش وياك مع كل ثانية انا فيها بستناك لو ضعت منى الحب مش هلقاه ولا هبقى عايشة حياة دى حياتى بس معاه انا كل قلقى بس م الايام تاخدك وتنسى قوام لانى صعب انساك قلقانة لتيجى اللحظة وتسبنى وتملى ده اللى شاغلنى وتاعبنى علشان معاك الدنيا حبيتها ومشاعرى بس انت اللى حستها

ونقص الشريط لافتتاح جمهورية مجنونة الدنيا

صباح الخير علي كل شعوب المدونات اللى جنبنا واللى جنب جنبنا انا جاية اعلن من مكانى المتواضع من بيت مصري اصيل افتتاح جمهورية مجنونة الدنيا يوم السبت الساعة 2.29 مساءا حسب التوقيت الكايروي لابدا بتنفيض دماغي من كل الافكار والحوارات والقصص والاحاسيس والتجارب اللى بتصوت وعايزة تخرج وملقتش منفذ غير جمهورية مجنونة الدنيا لتعلن بمنتهي الجنون والشفافية والبراءة بدون تزيف او تلون عن نفسها للعالم فسيب نفسك خااااالث هههههههه علشاااااااااااااان انت الان في مستنقع الجنون الفكرى العقلاني لدماغي وشريط فيديو مصغر لحياتى الشخصية والمهنية فادخل وسيب الشيبشب بره علشان لسه رشين ميه هههههههههههه